Një nga thesaret më të çmuara natyrore të Shqipërisë sapo mori një njohje të re ndërkombëtare. UNESCO ka shpallur Liqenin e Shkodrës Rezervë Ndërkufitare të Biosferës, duke e përfshirë atë në Rrjetin Botëror të Rezervave të Biosferës.
Nga brigjet e liqenit më të madh në Ballkan, te ligatinat, lumenjtë, malet dhe peizazhet që e rrethojnë, ky territor përfaqëson një pasuri të jashtëzakonshme natyrore e kulturore, ku biodiversiteti unik ndërthuret me traditat, historinë dhe jetën e komuniteteve lokale.
Ky vlerësim është rezultat i një pune të gjatë dhe të përkushtuar, e cila kulmoi me dorëzimin e dosjes së nominimit në UNESCO në shtator 2025, pas një procesi të gjerë bashkëpunimi ndërmjet institucioneve, ekspertëve, partnerëve dhe komuniteteve në Shqipëri dhe Mal të Zi.
Statusi i Rezervës së Biosferës UNESCO konfirmon rëndësinë globale të Liqenit të Shkodrës dhe e vendos atë mes territoreve që shërbejnë si modele për ruajtjen e natyrës, zhvillimin e qëndrueshëm dhe bashkëjetesën harmonike mes njeriut dhe mjedisit.