Është zhvilluar në datat 20 dhe 21 nëntor workshopi dyditor mbi projektin “Zgjidhje Mjedisore dhe Turistike për Liqenin e Shkodrës”, i financuar nga programi IADSA II dhe i implementuar nga Agjencia Kombëtare e Zonave të Mbrojtura (AKZM), në bashkëpunim me Universitetin e Barit “Aldo Moro” dhe organizatën “Njerëz dhe Ide”.
Gjatë sesioneve dyditore u prezantuan dhe diskutuan çështje kyçe që lidhen me sfidat mjedisore të Liqenit të Shkodrës, duke përfshirë ndotjen, erozionin, presionin urbanistik dhe ndikimet në biodiversitetin e zonës. Ekspertë të fushës sollën një analizë të detajuar mbi rreziqet aktuale dhe masat që duhen ndërmarrë për menaxhimin e qëndrueshëm të këtij ekosistemi të rëndësishëm.
Në kuadër të workshopit u prezantuan gjithashtu praktika të mira ndërkombëtare në menaxhimin e zonave ujore të mbrojtura, si dhe zgjidhje ekologjike për reduktimin e ndotjes dhe pastrimin e ujërave. Pjesë e diskutimeve ishte edhe promovimi i eko-turizmit si një mundësi për zhvillim të qëndrueshëm, duke ruajtur njëkohësisht vlerat natyrore dhe kulturore të zonës.
Ky aktivitet synoi forcimin e vizionit të përbashkët mbi mbrojtjen dhe zhvillimin e Liqenit të Shkodrës, duke krijuar një platformë bashkëpunimi mes institucioneve, ekspertëve, komunitetit dhe organizatave partnere. Workshopi nxit shkëmbimin e ideve dhe praktikave cilësore, duke kontribuar në hartimin e zgjidhjeve afatgjata për mirëmenaxhimin e ekosistemeve ujore në Shqipëri.