Rreth 30 ekspertë vendas e të huaj realizuan ekspeditën e tyre të parë në Vjosë, nga Përmeti në Konicë, në Gjirokastër e Tepelenë, duke përfshirë luginën e Bënçës, Shushicën, Bratajn e Selenicën, deri në grykëderdhje në Vlorë.
Ata zhvilluan vizita studimore dhe takime me komunitetet, bashkitë, organizatat dhe çdo palë të interesuar për të shpjeguar se ç’do të thotë “Vjosa, Park Kombëtar”. Një proces i cili synon të kthehet edhe në një model, në të cilin janë përfshirë ekspertë nga fusha të ndryshme si eko-turizmi, gjeomorfologjia, ekologjia, planifikimi dhe menaxhimi i zonave të mbrojtura, financimi i qëndrueshëm i parqeve kombëtare, legjislacioni mjedisor si dhe komunikimi publik.
