Aktivitete Archives - Agjensia Kombëtare e Zonave të Mbrojtura

Takim informues mbi Konkursin Kombëtar “Kullat e Vrojtimit – Inteligjenca Natyrale, Artificiale & Kolektive”

Redon Kasaj — Thu, 26 Mar 2026 10:28:24 +0000

Në mjediset e kubit inNature mirëpritëm studentët, të cilat kanë zgjedhur të bëhen pjesë e Konkursit Kombëtar “Kullat e Vrojtimit – Inteligjenca Natyrale, Artificiale & Kolektive”.

Një takim frytdhënës, në të cilin ndamë projekt-idetë e propozuara prej tyre, ku falë mbështetjes së UNDP Albania përmes programit #EU4Nature, do të bëjmë realitet tre projektet fituese. Një mundësi e shkëlqyer, e cila jetëson vizionin e të rinjve për një turizëm natyror sa më gjithëpërfshirës në territorin e zonave të mbrojtura të vendit.

Përmirësimi i infrastrukturës turistike në Ujërat Termale të Bënjës

Redon Kasaj — Thu, 26 Mar 2026 09:47:00 +0000

Ujërat Termale të Bënjës vijnë me një infrastrukturë të përmirësuar dhe të transformuar, duke përfshirë hapësira për vizitorët, parkim, zona pikniku, ambiente për produkte lokale dhe hapësira për aktivitete kulturore duke organizuar më mirë flukset turistike në funksion të konsolidimit të mëtejshëm të Bënjës si një model i turizmit të qëndrueshëm brenda zonave të mbrojtura.

Ministri i Mjedisit z. Sofjan Jaupaj, dhe Drejtoresha e Përgjithshme e Agjencisë Kombëtare të Zonave të Mbrojtura, znj. Juxhina Spahiu, realizuan një inspektim në terren, për të vëzhguar nga afër të gjithë investimin e realizuar në monumentin natyror më unik të Qarkut Gjirokastër, i cili tashmë është gati të mirëpresë fluksin e turistëve që sjell sezoni.

Mbahet Komiteti i Menaxhimit i Zonave të Mbrojtura Mjedisore të Vlorës

Redon Kasaj — Thu, 19 Feb 2026 10:39:06 +0000

Është mbajtur në qytetin e Vlorës Komiteti i Menaxhimit të Zonave të Mbrojtura Mjedisore të Qarkut Vlorë, nën drejtimin e Prefektit të Qarkut, znj. Evis Allushi.

Me prezencën e drejtoreshës së AKZM-së, znj. Juxhina Spahiu, Rektorit të Universitetit “Ismail Qemali”, Kryetarit të Këshillit të Qarkut, përfaqësuesve të pushtetit vendor, institucioneve lokale, shoqatave mjedisore etj., u trajtuan të gjitha çështjet mbi një menaxhim sa më efektiv të zonave të mbrojtura të qarkut. Takimi pati në fokus edhe Ditën e Inxhinierëve të Pyjeve, ku u dhuruan çertifikata mirënjohjeje për dy inxhinierë pyjesh, z. Abdul Çuçaj dhe z. Llazar Gjonça, të cilët ia dedikuan jetën e tyre pasionit për pyjet dhe natyrën.

Takim mbi Planin e Veprimit për Parkun Kombëtar “Mali i Dajtit”

Redon Kasaj — Thu, 12 Feb 2026 13:13:55 +0000

Në kuadër të implementimit të Planit të Menaxhimit për Parkun Kombëtar “Mali i Dajtit”, UNDP Albania, Agjencia Kombëtare e Zonave të Mbrojtura dhe AdZM Tiranë, janë angazhuar në procesin e finalizimit të Planit të Veprimit për Parkun Kombëtar “Mali i Dajtit”.

Ky plan synon të sigurojë një model të qëndrueshëm financiar dhe menaxherial për parkun, duke integruar ruajtjen e biodiversitetit me zhvillimin e turizmit të qëndrueshëm dhe përfshirjen e komunitetit lokal. Përmes këtij dokumenti do të përcaktohen prioritetet strategjike, burimet e financimit, mekanizmat e gjenerimit të të ardhurave, si dhe masat konkrete për rritjen e eficiencës në administrim dhe shërbime.

Censusi Ndërkombëtar i Shpendëve Ujorë Dimërues në Shqipëri 2026

Redon Kasaj — Thu, 12 Feb 2026 10:35:31 +0000

Censusi Ndërkombëtar i Shpendëve Ujorë është një program monitorimi që zhvillohet çdo vit njëkohësisht në 143 vende të botës, për të mbledhur informacion mbi numrin e shpendëve ujorë.

Për vitin 2026, Censusi u realizuar në datat 17-18 Janar, me pjesëmarrjen e 12-të Administratave Rajonale të Zonave të Mbrojtura, ekspertëve ornitologë, institucioneve akademike, si dhe vullnetarë të shumë, të cilët së bashku bëjnë të mundur realizimin e procesit të punës në terren, nëpërmjet vëzhgimit dhe numërimit të specieve në 34 zonat e paracaktuara. Identifikimi dhe teknikat e monitorimit të shpendëve, si dhe organizimi për ndjekjen e procedurave, janë hallkat kryesore që çojnë në mbledhjen shkencore të të dhënave për shpendët e ujit, mbi bazën e të cilave vlerësohen popullatat e tyre.

Takim koordinues mbi realizimin e Censusit Ndërkombëtar të Shpendëve Ujorë Dimërues

Redon Kasaj — Fri, 09 Jan 2026 10:50:03 +0000

Janari është muaji i Censusit Ndërkombëtar të Shpendëve Ujorë Dimërues, eventit vjetor më të rëndësishëm për popullatën e shpendëve në Shqipëri.

Agjencia Kombëtare e Zonave të Mbrojtura, së bashku me AOS-Albanian Ornitological Society, realizuan takimin kordinues mbi zhvillimin e një procesi sa më cilësor dhe efektiv, në data 17-18 janar 2026.

34 pika numërimi do të ndiqen nga ekspertë ornitologë, 12-të AdZM, organizata jo-fitimprurëse mjedisore, studentë dhe dashamirës të natyrës, të cilët do të japin kontributin e tyre në numërimin dhe vlerësimin e popullatave të shpendëve të ujit në zona ligatinore bregdetare, liqene natyrore dhe artificialë, grykëderdhje lumenjsh, këneta, etj.

Mbahet Konsultimi Publik mbi Parkun Kombëtar “Divjakë-Karavasta”

Redon Kasaj — Mon, 29 Dec 2025 11:58:50 +0000

Ministria e Mjedisit, Bashkia Divjakë dhe Agjencia Kombëtare e Zonave të Mbrojtura organizuan konsultimin publik, mbi disa prej projekteve me rëndësi për Parkun Kombëtar “Divjakë-Karavasta”.

Projekte të cilat kanë për qëllim zhvillimin, qëndrueshmërinë dhe praktika të zgjuara për të ofruar një kontribut efektiv për banorët e zonës, parkun dhe turistët e shumtë që zgjedhin të vizitojnë këtë pasuri kombëtare. Në prani të të gjithë pjesëmarrësve prezantuam projektet dhe qëllimin për të cilin ato do të ndërmerren, duke ndërvepruar kështu të gjithë së bashku, për të ofruar një ndërhyrje sa më cilësore për zonën.

E-learning, natyra në platformën e Shkollës Shqiptare të Administratës Publike (ASPA)

Redon Kasaj — Thu, 18 Dec 2025 13:48:08 +0000

UNDP, në partneritet me Shkollën Shqiptare të Administratës Publike (ASPA) dhe Agjencinë Kombëtare të Zonave të Mbrojtura, zhvilloi në Tiranë takimin kushtuar ndërtimit të kapaciteteve përmes mësimit digjital, në kuadër të projektit EU4Nature. Platforma e-learning, tashmë e integruar në sistemin e ASPA-s, po shndërrohet në një mjet konkret për trajnimin e stafit të zonave të mbrojtura, i përditësuar me module të reja dhe përmbajtje praktike në funksion të menaxhimit të qëndrueshëm të zonave të mbrojtura.

Përfaqësues nga AKZM, Administratat e Zonave të Mbrojtura dhe Zyra e Administrimit të Parkut Kombëtar të Lumit Vjosa janë mbledhur për të diskutuar se si digjitalizimi po kalon nga ide në zbatim real. Synohet që stafet të trajnohen në mënyrë sistematike, me kosto të ulët dhe të pavarur në kohë.

Vlerësimi dhe ngritja e kapaciteteve të komiteteve menaxhuese në zonat e mbrojtura mjedisore

Redon Kasaj — Thu, 18 Dec 2025 09:01:36 +0000

Vlerësimi dhe ngritja e kapaciteteve të komiteteve menaxhuese në zonat e mbrojtura mjedisore. Zonat e mbrojtura përbëjnë një nga instrumentet më të rëndësishme për ruajtjen e biodiversitetit, ekosistemeve natyrore dhe trashëgimisë mjedisore të vendit. Megjithëse rrjeti i zonave të mbrojtura është zgjeruar ndjeshëm gjatë dekadës së fundit, efektiviteti i menaxhimit mbetet një sfidë thelbësore. Rritja e presioneve nga aktivitetet njerëzore, zhvillimi turistik i pakontrolluar, shfrytëzimi i burimeve natyrore dhe bashkëpunimi ndërmjet institucioneve, përbëjnë pengesa serioze për ruajtjen e vlerave natyrore dhe kulturore të këtyre zonave.
Bazuar në Ligjin nr. 81/2017 “Për zonat e mbrojtura”, i ndryshuar, Komitetet e menaxhimit, mbikëqyrin dhe sigurojnë për zbatimin e planeve të menaxhimit në zonat e mbrojtura mjedisore. Për këtë, Agjencia Kombëtare e Zonave të Mbrojtura, me mbështetjen e UNDP, nëpërmjet projektit EU4Nature, ka vlerësuar dhe hartuar një studim mbi ngritjen e kapaciteteve të komiteteve të menaxhimit në zonat e mbrojtura mjedisore.
Në praninë e Znj. Randi Davis – Përfaqësuese e Përhershme e UNDP në Shqipëri, realizuam një takim me 12-të Prefektët. Mirënjohje për kontributin e tyre në takim dhe për bashkërendimin e pakushtëzuar në çdo aksion, çdo projekt, çdo sfidë që përballim së bashku.

Nis puna mbi hartimin e “Planit të Integruar të Menaxhimit për Parkun Natyror Qafështamë”

Redon Kasaj — Thu, 18 Dec 2025 08:40:21 +0000

Në kuadër të hartimit të Planit të Integruar të Menaxhimit për Parkun Natyror “Qafështamë”, u zhvillua takimi i parë prezantues me përfaqësues nga Agjencia Kombëtare e Zonave të Mbrojtura, AdZM Durrës, si dhe me ekspertë të angazhuar në hartimin e këtij plani.
Ky takim shënoi hapin e parë drejt një procesi gjithëpërfshirës dhe bashkëpunues për përgatitjen e një dokumenti strategjik, i cili do të udhëheqë menaxhimin e qëndrueshëm të parkut.