Kryeministri Rama lançon “Smile Albania2”

Kryeministri Edi Rama ka marrë pjesë në aktivitetin e organizuar për lancimin i projektit kombëtar “Smile Albania 2019”, në edicionin e saj të dytë. Projekti “Smile Albania” ka hyrë në edicionin e tij të dytë me 500 të reja e të rinj të punësuar për sezonin veror.

 

“Doja të isha në këtë takim me ju sepse eksperienca e vitit të shkuar ishte një eksperiencë e parë, një nismë e re, e konceptuar nga ministri i turizmit dhe kishte shumë pikëpyetje si çdo gjë e re, ashtu siç edhe ju patë skepticizëm por ishte një nismë që ia vlejti dhe ripërtëritja e saj këtë vit ishte si të thuash krejt e natyrshme, ndërkohë që patjetër mësimet e vitit të shkuar kanë vlejtur si një eksperiencë për ta përmirësuar këtë nismë në përmbajtjen e vetë dhe njëkohësisht patjetër për ti dhënë mundësi 500 vajzave dhe djemve si ju që të punësohen gjatë pikut të sezonit dhe jo vetëm të mund të nxjerrin disa kursime që nuk bëjnë keq por edhe përfitojnë nga kjo eksperiencë. Është një eksperiencë njerëzore dhe profesionale komunikimi por është edhe një eksperiencë nëpërmjet të cilës edhe ne vetë marrim shumë informacion”, tha Rama.

Kreu i qeverisë u shpreh më tej se kjo nismë ka të mirën sepse me një shpenzim të vogël e përmirëson shumë marrëdhënien e vizitorëve me vendin, kudo ku këto pika kontakti funksionojnë.
“Janë shumë dhe janë inkurajuese mesazhet e turistëve vetë. Për shembull një prej tyre të shkëputur në një gazetë lokale në Gjirokastër, një website shkroi se turistët ishin surprizuar në Qafën e Muzinës për të cilin kishin dëgjuar se dilnin maskat por në fakt aty iu kishin dalë një grup vajzash e djemsh të ‘Smile Aalbania’. në momentin e parë i kanë marrë si një grup kriminal të sofistikuar por faktikisht e kundërta ishte e vërtetë dhe ky ishte një impresion pozitiv”, tha kryeministri.

 

Sipas tij, një funksion tjetër i kësaj nisme është përfshirja në vijimësi e studentëve, vajzave e djemve që janë ende në rrugën para se të hynë në autostradën e madhe të jetës, në realitetin e përditshëm të vendit sipas profileve e pasioneve të tyre. “Më vjen shumë mirë që edhe në këtë aspekt jemi në kushtet kur shumëçka ka ndryshuar që nga koha e protestës së studentëve falë paktit për universitetit”, tha Rama. Sipas tij të gjithë shqiptarët duhet të punojnë për të përmbushur pritshmëritë e turistëve vendas e të huaj. Kryeministri publikoi edhe të dhënat e një ankete, sipas së cilës, 87 për qind e turistëve të huaj janë të kënqur mme Shqipërinë, ndërsa 93 % e tyre e rekomandojnë Shqipërinë si destinacion të preferuar turistik. Për të dytin vit radhazi, ministria e Turizmit dhe Mjedisit lançoi projektin “Smile Albania”. Ministri i Turizmit dhe Mjedisit, Blendi Klosi pasi foli për efektet pozitive që ky projekt pati në sezonin e parë, tha se në fokus të këtij viti do të jetë mbrojtja dhe promovimi i mëtejshëm i turizmit nëpër botë.